Ti7L6iM

تساؤلات او هلوسات الويك اند... مادري

• ليش كل مذيعات الاخبار يلبسون بوالطو
• ليش كل البنات صارو رياضيات "مؤنث رياضيين" وصار لبسهم كله ترينيج؟
• ليش صارو الناس بالعيد مايعيدون بالديره واللى مايسافر يحجز شاليه
• ليش المجمعات الصبح زحمة اكثر من الليل؟ "شنو محد قاعد يداوم؟
• ليش كل ما مجموعة ناس هبو بشي تلاقي كل الكويت هبو فيها بغض النظر هالشي يناسبهم ولا لأ
• ليش منصب الوزير صار منصب طارد حق اى شخصية او كفاءة تبي تسوي شي حق الديره؟
• ليش يسوون اجتماعات قمة عربية؟
• ليش حليمة بولند تسوي حركة خشيم الفار ؟ LoL
• ليش قاموا يسوون الاستقبالات بالمستشفيات؟

واخيرا وليش اخرا .. ليش انا قاعده اتحلطم الحين؟

HaPpy WeeKEnD

Haben Feha Hal aYam :P

فشة خلق

واااو الجو صاير حده رهيب مو مال قعده بالبيت كلش وانا حدي مستعيله متى ايينا البرد عشان اطلع الهدوم الشتويه والبوالطو... عاد انشالله السنه ايينا برد سحتني نفس العام عشان البسهم.. المشكله حدي مستعيله على دوة الفحم وكل مارحت بيت اهلي اقول حق امي متى بتشبون دوه؟ وعلى طاري هالجو الحلو... اتمنى تصير اجواءنا السياسيه نفس حلاة هالجو بس اعتقد هالشي مستحيل__ترى بتكلم بالسياسه اوكي__يعني هالجو المتوتر بالديره تخلي اللى ما يتحجى يتحجى ... يعني معقوله جذي ...لا استقرار وزاري ولا اداء نيابي مثل الناس وكل همهم طيحوا القروض وزيدو المعاشات...هذا غير الغلاء اللى شاب بالديره والفساد و..و...اسعار النفط شبت وماكو اي مشاريع تنمويه بالديره لا صحه ولا تعليم... دايما بيني وبين نفسي أقول عقب 20 سنه شنو بيكون وضع الديره؟ اتوقع يا اما بيكون على طمام المرحوم او بيكون اسوأ ويضل عداد الترشيد ينور شاشتنا الفضائيه كل صيف

فضول

جم اجار شقتكم؟ جم قسط قرضكم ؟ ليش للحين ما حملتي؟ عالجتي ولا لا؟!!! ريلج جم معاشه؟ ضعفانه وايد شمسويه؟؟..عمري ما تخليت نفسي بيوم من الايام اسأل اى وحده حتى لو كانت قريبه مني حيل اسئله من هالنوع.. لاني احس انها من الخصوصيات ومالي حق اعرفها وحتى مايهمني اني اعرفها.. بس وايد الاحظ ان هالنوع من الاسئله تدور في يمعات الحريم والاستقبالات ,وساعات تنطرح بين ثنتين مافيه بينهم ميانه, او ممكن اول مره يتعرفون على بعض بهاليمعه او الاستقبال.. يعني الوحدة لو يصادفها انسانه جذي شتسوي .. تجاوبها ولا تسكت؟ وممكن اذا سكتت يقولون عنها خايفه على روحها من الحسد.. ولا هالوحده ماتحب تقول عن روحها اى شي..جذي صارو يفسرون السالفه مع ان الموضوع انها سالفة خصوصيات ومو لازم الكل والجميع يعرفها.. مادري ليش احس ان بلاغة الشف والحسد وايد انتشر عندنا والمشكله انه كل ما زاد الخير والنعمه زاد الحسد

الكويتي CSi

مع ان مستوى المسلسلات الكويتيه انحدر وابدا ما يعكس واقع المجتمع الكويتي بشكله الصحيح... لكني ملاحظه ان تلفزيون الراي بالفتره الاخيره قاعد ينتج مسلسلات بالمره مافيها اى قيمه فنيه.. بس مجرد ملء ساعات البث على غير معني.. مسلسل جمانه الرائعه الفنيه اللى اتحفنا فيه قبل فتره ..لا قصه ولا حوار ولا ترابط درامي مجرد اشخاص يتحجون بدون هدف.. والتحفة الثانيه شي ماقدر اسميه مسلسل اسمه مذكرات امونه!! مواقف كوميديه عفا عليها الزمن ... يعني لو بطالع مذكرات بو عليوي ولا اجلح واملح يمكن بستانس اكثر... انا بس بقول حق هالناس اللى تسوي هالمسلسلات شوفو حلقه وحده من ديسبرت هاوس وايفز وانتو تعرفون شنو التلوث العقلي اللى قاعدين تعرضونه لنا هذا بوستر اجلح واملح للى مايعرفه :P

Fantacy World Malna Gabel :P~

WeeKend WeekEnd

خلاص اقروا عطلة الجمعة والسبت ومادري شكثر راح ناخذ عشان نتأقلم عليها.. باعتقادي ان وايد اشياء بالمجتمع الكويتي راح تتغير... ايام الزوارات.. حفلات الزواج والاستقبالات.. خصوصية يوم الاربعا كيوم حلو بالنسبة لنا نطلع نستانس فيه لان اخر يوم عمل , وطبعا راح تتغير نظرتنا حق يوم السبت بانه يوم كئيب وممل وطويل لانه اول يوم عمل ودراسة وراح تنتقل الكآبة ليوم الاحد.. بس على قولة القايل التغيير حلو :)

CooKing :P

على ضغوط شديده هالايام اني لازم اطبخ.. كانت لي محاولات مع الطبخ بعضها ناجح جدا وبعضها "حاجه تكسف" مو يقولون الطبخ نفس .. انا احس ان نفسى بالطبخ مو شي مادري ليش مع اني ودي اكون طباخه ماهرة بس كله الاكل متعومس معاي.. قاعده احاول اخذ وصفات من الوالدة عشان اطبقها...امي جزء من المشكله .. يقولون لي شلون الوالده تطبخ هالطباخ الطيب وانتي ماتعرفين تسوين شي {بقطها براس امي الحين} طبعا عندي مكتبه كامله من كتب الطبخ من جميع اجزاء كتب المطاحن الى كتب عبير الراشد وكتاب الطباخه بيري وهذا تقريبا نفس المجلد فيه شرح بالصور بس ولا مره سويت منه شي مع اني شاريته من سنه .. والطامة الكبري اني احب اطالع برامج الطبخ مادري ليش .... احسها متعه صج.. تصنع شي من ايدك وتاكله وتوكل اللى تحبهم "منو اللى اخترع نظريه اقرب طريق لقلب الرجل معدته ودي اذبحه" بحاول اخذ كورس مكثف هالاسبوع وماني طالعه من المطبخ كلش يااغلبه يا يغلبني...صج مساكين احنا يالنساء علينا وايد ضغوط نفسيه :P

TathkRoonHa?

ما ودكم فيه الحين؟ :P

السفر ضروره ولا رفاهيه؟

السفر متعه ووناسه مالها حدود وكل انسان وده يسافر كل سنه يغير جو ويجدد نشاطه ويتعرف على ثقافات وعادات المجتمعات الثانيه.. لكن اذا ماحصلت للواحد فرصه انه يسافر بالصيف لظرف من الظروف هل اهوه بهالحاله ينعد من فئة الفقاره والحفاي والهيلق.. او انه ينحط بمستوى اقل من باجي الناس اللى تسافر؟..وحدة من زميلات الدوام فاتحه موضوع السفر من شهر 3 اللى طاف وكل يوم والثاني تسألنا " ها ماراح تسافرون هالسنه " واذا وحده منا ردت انها السنه ماراح تسافر ترد علينا بكلماتها الفذه " انا اذبح نفسي واتسلف بس اسافر.. ماقدر تمر علي سنه بدون سفر " مع العلم ان عليها اقساط وقروض ومتسلفه من ناس بس المهم انها تسافر.. معقوله في ناس تفكيرها جذي؟!.. اضغط على عمري طول السنه واهلق بروحي عشان استانس شهر او اقل وتالي ارد حق الديون والغثا!؟.. انا للاسف ماقدر اسوي وماقدر ابخل على نفسي بشي .. حصلت لي سفره اهلا وسهلا.. ماحصلت اقعد هني واستانس كثر ماقدر بدون ديون وعماة عين خلاصة الحجي : على أد لحافك مد رجليك :))

Mako ShiGhL :P

مادري ليش احس يتشابهون

مستشفيات تييب المرض

اجبرتني الظروف وانشالله ماتجبر احد اني اراجع مستشفى الصباح ولاني من النوع اللى مامرض وايد والحمدلله ,مالي خبره وايد بالمستشفيات ودهاليزها ..المهم ان اللى شفته ان اغلب اللى يشتغلون هناك وخصوصا الجنس اللى نقدر نسميه الجنس الناعم نفوسهم بخشمهم ومايردون على احد اذا واحد بغى يستفسر عن شي.. ممكن اني افهم ان من كثر المراجعين اللى يمرون عليهم ونوعية الناس اللى هناك تكون نفسياتهم تعبانه شوي او متضايقيين, هذا شي ممكن افهمه لان كلنا بشر ولنا طاقة تحمل... لكن السلام محد يرد عليك ليش.. تدخل غرفه تسلم والمشكله ان يطالعونك بعيونهم بس مايردون" على فكرة ما تبين الا عيونهم لان اغلبهم من فئة المنقبات " وايد استغربت من هالطريقه مع اني اسمع سوالف وايد عن المستشفيات الحكوميه بس لما عشت التجربه بنفسي حسيت فيها عدل... نهاية تجربتي هذي قررت ان اقاطع المستشفيات الحكوميه وارد حق مستشفيات القطاع الخاص وايد ابرك ولو ان اغلبها تجاريه ويدورون الفلوس بس المهم الواحد يروح هناك وتكون نفسيته مرتاحه واذا بغى يسأل عن شي يلقى من يرد عليه بنفس بدل سياسه المطالع بالعيون والحقران اللى متبعينها بمستشفيات الحكومه

الصرخه المكبوته

امس في برنامج فوزيه الدريع اتصلت وحده مصريه تبي تتكلم عن مشكلتها وقالت ان هالمشكله عمري ماتكلمت فيها مع احد حتى مع نفسي طبعا واهيا تتكلم كانت صوتها متحشرج بالدموع..قالت انها واهيا كانت صغيره كانت تشوف امها واهيا تخون ابوها مع رياييل..عمها, جارهم, خال ابوها وتقول ان امها الحين تغيرت وراحت العمره بس اهيا مو قادره تنسى هالشي اللى كانت تشوفه " اكيد شي مستحيل الانسان ينساه " وتقول انها تييها رغبة انها تصرخ بأعلى صوتها حتى واهيا قاعده بين الناس..فوزيه الدريع ردت عليها انها اول شي لازم تسامح امها من الداخل عشان تتخلص من مشكلتها وبعدين لازم تروح حق طبيب نفسي يسويلها علاج اسمه الصرخه المكبوته وانها تصرخ متى ماحست بهالشي "بس طبعا تكون بروحها " مثلا تحت الدوش او تحط وييها بالمخده وتصرخ ظليت افكر بهالمشكله طول الليل وحيل اثرت فيني.. ياترى الانسان محتاج جم صرخة مكبوته عشان ينسى اشياء مؤلمه مرت بحياته

مجموعة متناقضات

تكانه و رقله..... عصبيه وحنونه....... رومانسيه وواقعيه.... مرحه وثقيله ........ مجموعة متناقضات داخل انسان واحد.. كيف يمكن للنفس البشريه ان تحتوي هذه الاختلافات في روح واحده.. وهل يستطيع الانسان ان يعزف على جميع اوتار هذه المتناقضات...ام ان الله خلق فينا هذه المتناقضات حتى نستطيع ان نعيش هذه الحياة بأمواجها ومدها وجزرها ..ماذا لو ان الانسان كان يعيش على وتيره واحده لا تتغير ... هل كنا نستطيع العيش والتكيف مع بعضنا البعض..

BaiTh aL9a3WoOooOo

موزعين علينا كاكاو بأحد استقبالات الولادة اللى هابين فيها يسوونها بالمستشفيات والحين بعد فاتح رويال حياة ربي مايقصر.. حق المطالع والمزامط.. المهم مع الكاكاو حاطين جم حبة بيض الصعو" كليتهم قبل لا اصور هالصورة" ومعاهم مجسم نعال وانتو بكرامة.. تهقون ليش هالمجسم يعني؟ خلصت الفناتك ولا شنو

لغة عربية!!

اقدس اللغة العربية وطول مراحلي الدراسية كنت متفوقه بالعربي اكثر من باجي المواد...حتى بالتعبير كنت اخذ علامة كاملة...حتى زميلاتي بالمدرسة كانو يخلوني اكتبلهم مواضيع التعبير .. .. ما طورت هالموهبه او هالمهارة عندي لاني حدي كسولة وكله مالي خلق.. المراد الحين لي ييت اكتب مسج حق احد اكتب لهم بالحروف الصحيحة مثلا انا بالبيت مو انا بلبيت! او مثلا تبون تطلعون ؟ مو بطلعون؟ والاحظ انه وايد يكتبون الكلمات بهالطريقة ويبلعون الحروف واستنكر هالشي صراحة وايد.. احس ان لازم يكتب الكلمة عدل !!! والمشكله ان رفيجاتي يستغربون مني ويقولون لي ليش تكتبين الكلام جذي؟؟؟ يعني انا صرت غلط الحين؟؟ وفعلا وايد الاحظ ان الاملاء عند الناس كله غلط بغلط والشي هذا يبط جبدي!!!لغتنا العربية اندثرت واحنا مو حاسين

شفيها؟؟؟

شفت هالصورة بالجريدة حدي استغربت ..شفيها انتصار الشراح ينت عقب الحجاب ... اهم شي قلب الحب اللى بين ريولها ..حنان دشتي ساعات تهول بالممثلات الله يهداها

تابع هلا فبراير :)

طبعا هذي كانت تقدم فعاليات المهرجان بس قاعده بالاستديو.. اول شي كانت عادي حجابها طبيعي تالي اشوف ولا مطلعه ترجيتها!! ليش عاد جذي.. اكيد قالت الناس كلهم كاشخين انا بعد بكشخ.. وبعدين ليش جذي كوبي من حجي حليمة بولند نفس الدلع نفس الاكسنت..ماتقدرين يعني تسوين حق روحج شخصيه مميزة..بس تقليد وخلاص.. النجاح مايصير الا بالدلع يعني ولا شنو؟

ّ!! هلا فبراير

قعدت يوم الخميس من النوم قلت خل ابطل التلفزيون اشوف كرنفال هلا فبرابر لان ادري ان اليوم الافتتاح من اعلانات الجرايد اللى نشروها ..قلت يمكن السنه مطورين بالافتتاح شوي ضايفين اشياء يديده .. غير سالفه انهم يسكرون شارع سالم المبارك والعروض تمشي وهالفرق تدق وترقص بالشارع... تفاجأت صراحة بمستوى "الكرنفال" او اللى نقدر نسميه تجاوزا كرنفال.. شي مو منظم خير شر, ناس بس قاعده تمشي هايمه مادري وين رايحين..موزعين كذا ستيج على الشارع وحاطين فرقه تعزف اهني مذيع يقدم مسابقات هناك.. ناس يرقصون ذاك الصوب.. مستوى بدائي صراحه.. يعني حتى احتفالات الستينات والسبعينات كانت ارقى من جذي .. ليش صرنا جذي.. مبين ان الاحتفال منظمينه بجهود فرديه.. ياربي ييبوا ناس تسنع لكم الشغل ليش جذي شوفو دبي شتسوي كل سنة شي يديد..... لا وتالي طلع واحد من منسقين المهرجان يقول ان المجمعات اللى مشاركة اهيا مجمع مغاتير والحمرا مول!! بهذي مابي اعلق عاد انا اقول لو تلغون هالمهرجان وايد ابرك لكم

من كنت بالثانويه ونظري ضعيف وظليت استعمل النظارات والعدسات ليما الحين قررت اسوي عمليه ليزك عقب ماشفت الكل قام يسويها وانها شغله سهله وبسيطه بس هم خايفه مادري ليش! صليت استخاره وشوي ارتحت بس هم شوي اوسوس لان هذا شي بالعيون مو سهله انشالله تعدي على خير

من ذاكرة التلفزيون

مذكرات بحار

البحر أجمل ما يكون.... لولا شعورى بالضياع..... لولا هروبى من جفاف مدينتى الظمأى وخوفى.... أن أموت..... عريان فى الأعماق أو فى بطن حوت...... أنى أحاذر أن أموت...... لما أفكر أن لي بيتا ولي فيه عيال..... لما أحس بأن في الدني جمال..... يا أيها الفجر المشع ويا أصائل يا ليال...... الشمس في الآفاق كالايمان في قاع النفوس...... ومن القلوب المؤمنات....... بالأرض والانسان تنبثق الحقيقة والحياة....... زرقاء صافية كعين حبيبتي عند اللقاء....... كالفجر كالأمواج حين تنام كالأفق المضاء........ وكما يشع النجم في كبد الظلام..... يأتي الربيع من الشتاء................ وغدا ستمطر غيمتي . ويذوب في الرمل...... الصقيع.. والمجد للأسرار في القلب العظيم..... والى المحبة للجميع....... والى الربيع..... في كل أرض في الشمال أو الجنوب..... والمجد للمحار في كفي هدايا للعذارى...... الطاهرات...... الحاملات جنين انسان الحياة....... القارع الأجراس في ليل الطغاة....... يا بحر يا محار يا سحر الأصائل يا غداة...... آمنت ان غدا سيشرق في بلادي والحياة........... ستدب حتى في الرمال....... ومن التشرد في البحار....... سيشع في روحي النهار.....

بررررررررررررررررررررررررررررد

مع اني اموت على البرد والشتا بس هالبرد حده كسرنا.. مو طبيعي هالجو..اول يوم العيد لما طلعت تيبست بمكاني من البرد.. بس هم البرد حلو عشان نلبس هالبوالطو " جمع بالطو" اللى نشتريهم بأغلى الثمن ومانلبسهم الا جم اسبوع.. واحلى شي بالبرد تتلحف انت والدفايه وانت تاكل كاكاو ومجابل التلفزيون.. شعور خيال :P