تومكاري سديكو " الاصلية "
الحمد لله والشكر
قناة سكوب شفيهم ينوا؟ حاطين السنافر وبارني ومركبين عليهم اغاني ينغزون على نائب معين...واسئلة مليقه وعليها اجابات املق!!!شنو هالمستوى؟ قناة مراهقين ولا يستعبطون ولا شسالفة؟؟وغصب بيسوون بو عيدة حبيب الشعب...شوفوا نوعية الناس اللى يدقون عليه وتعرفون السالفه...ماقول الا الحمدلله والشكر
وانا كل ما قول التوبه يابوي
تائب
.jpg)
مو تائب
!!!
مقابلة حسين الاحمد بتلفزيون الوطن ببرنامج تو الليل حدها غريبة عجيبة وتضحك بعد..تاب ولا رد يغني شي بينه وبين ربه محد يتدخل فيه...بس كلامه بالمقابله غريب ومتناقض
- كل ما سألوه عن شي قال اسمحولي ماقدر اذكر أسامي
- ماكان رايح افغانستان كان رايح ايران يسوي اسنانه
- لما كان تايب ناس عرضوا عليه شيكات على بياض عشان يسب الرسول والاسلام
- مايبي يكون اهوه وفرعون بنفس الاوتيل
- ما يبي الناس تزعل منه (دامك مقتنع باللى سويته ليش خايف من الناس(؟؟
- يقول ان لحيته وقت التوبه ما كانت طويله!!! عجبي
- استشار محمد الدغيشم قبل لا يرد يغني
تهور
بتهور وأتابع مسلسلات تركية...مع اني ما تابعت لا نور ولا سنوات الضياع...بس قلت نغير من العربي والامريكي لي شي يديد...الحلو بهالمسلسلات ان الاكشن والاحداث من الحلقات الاولى....ولازم البطل "وسيم"!! .... متابعه ممتعه لي ان شاء الله
الحمد لله حمدا كثيرا طيبا مباركا فيه مباركا عليه كما يحب ربنا ويرضى
اللهم لك الحمد ملئ السماوات وملئ الارض وملئ ما بينهما وملئ ما شئت من بعد
------
بعد انتظار ومعاناة ست سنوات
---------
ولهفة وترقب وألم في بعض الاحيان
----------
تحقق الحلم
الانتطار الممل
انطر نتيجة شي وايد مهم هالايام...والانتطار ذابحني والتفكير شل عقلي..الله يحقق اللى في بالي يارب
مثقفة
حاطتلي كتاب بمكتبي بالدوام...عشان اذا خلصت شغلي وصار عندي فراغ اقعد اقرا فيه... احسن من الزيارات بين المكاتب والقيل والقال...ومع اني اتزاور مع زميلاتي ونسولف, بس ساعات الواحد يزهق من الحجي والقرقه... ويحب يكون بروحه... المهم ان جم مره تدخل علي وحده من زميلاتي وتشوفني ماسكه الكتاب تقولي "ها يالمثقفه " ..........شدعوه! بس عشان قاعده اقرا كتاب خلاص صرت مثقفه.....طبعا اهيا مو نيتها تتطنز او شي لاني ادري شنو هالبنت وشنو نفسيتها بس تقولها من باب الدعابه ...المقصد من هالسالفة ان القراءة صارت شي غريب حق الناس...وشي نادر يمكن... ..خصوصا مع ظهور وانتشار الانترنت والتلفزيون... وانا نفسي صرت كسوله بالقراءة مو مثل قبل... كنت اشتري مجموعة كتب من معرض الكتاب وبشهر او شهرين مخلصتهم... الحين الكتب تقعد بالاشهر ومالي خلق اقراهم...مع اني متعوده من الصغر على القراءة.. ومن وعيت على الدنيا ومكتبة ضخمة موجوده ببيتنا ...لان ابوي الله يعطيه الصحه شغوف بالقراءة... وهالجو حيل كان له تأثير علي ...يعني من صغري وانا اقرا مجلة ماجد ... وانطر يوم الاربعا عشان اروح اشتريها ... وكانت شخصيتي المفضلة موزة الحبوبه :) وهالحجي تقريبا كان ليما وصلت المرحلة المتوسطه ... وذاك اليوم اقول حق بنت اخوي اللى برابعه ابتدائي واهي تتصفح مجلة اليقظة وتقرا اخبار هيفا ومريام فارس ...ليش ماتقرين مجلات حق سنج مثل سبيس تون او مجلة ماجد ترد علي تقول شنو انا ياهل!!! ياربي شنو هالجيل.... انا بعمرها كنت للحين قنقوصتين وشريطة..خلاصة القول...احنا بحاجة حق بناء جيل يقرأ لان حضارة الاوطان تقاس بالقراءة
كبير يا بوخالد
فعلا فنان مبدع وكبير...واغانيه علمتنا معني الحب والشوق والوله... الله يشافيه ويقومه بالسلامه
WithOut Title!
في البوست اللى طاف تعرضت حق طوفان من السب من احد البلوقز واللى انا متأكده ان كان متعرض للاختراق لانه كان يعلق على مواضيعي من قبل وكان قمة الاخلاق والذوق.... المهم انا من الخرعه سكرت الكومنت وماعرفت شسوي وحتى كنت بلغي البلوق بكبره...عاد عقب ما تمالكت اعصابي وييت بلغي التعليقات البايخه اللى انكتبت ماعرفت اردهم!!! حاولت مني مناك بالسيتينج هم ما عرفت كل شي مقفل ما يطلعونلي الكومنتس!!! فخلاص يأست قلت ماكو فايده...وقلت بكتب بوست يديد واشوف شيصير .. وانا قاعده اتعبث شوي ولا يردون الكومنتس يطلعون مرة ثانيه!!!قلت زين الحمدلله على السلامه... مسحت الكلام البايخ وضبطت الشغل كله وبرجع اكتب مره ثانيه فيه...المهم انا للحين مو عارفه سبب هالشي اللى صار؟هل اهو مجرد لعانه وسوء تربيه وتحرش؟ ولا عشان نوعية الموضوع نفسه؟ ولو اني شايفه انه حده عادي ... عاد انا على هالموقف طلعت لي حكمة عجيبه.... " انا انسب اذن انا موجود" :P~~~~~~~
اه يا الكويت
عيدنا الوطني السنه ياي بوقت حرج ومشحون...وكل من قام يزايد على حب الكويت...اتمنى هالازمة تنتهى بموقف رسمي جاد وصريح عشان نعرف راسنا من كرياسنا...وبسنا عاد صراخ وكلام ......اكثر شي بط جبدي لما قال... {احنا مو من حزب الله...لان ما نوصل مواصيل حزب الله} قـــــــــــــــــــــــــــــــــــــــــــــــهر
Subscribe to:
Posts (Atom)
