حاطتلي كتاب بمكتبي بالدوام...عشان اذا خلصت شغلي وصار عندي فراغ اقعد اقرا فيه... احسن من الزيارات بين المكاتب والقيل والقال...ومع اني اتزاور مع زميلاتي ونسولف, بس ساعات الواحد يزهق من الحجي والقرقه... ويحب يكون بروحه... المهم ان جم مره تدخل علي وحده من زميلاتي وتشوفني ماسكه الكتاب تقولي "ها يالمثقفه " ..........شدعوه! بس عشان قاعده اقرا كتاب خلاص صرت مثقفه.....طبعا اهيا مو نيتها تتطنز او شي لاني ادري شنو هالبنت وشنو نفسيتها بس تقولها من باب الدعابه ...المقصد من هالسالفة ان القراءة صارت شي غريب حق الناس...وشي نادر يمكن... ..خصوصا مع ظهور وانتشار الانترنت والتلفزيون... وانا نفسي صرت كسوله بالقراءة مو مثل قبل... كنت اشتري مجموعة كتب من معرض الكتاب وبشهر او شهرين مخلصتهم... الحين الكتب تقعد بالاشهر ومالي خلق اقراهم...مع اني متعوده من الصغر على القراءة.. ومن وعيت على الدنيا ومكتبة ضخمة موجوده ببيتنا ...لان ابوي الله يعطيه الصحه شغوف بالقراءة... وهالجو حيل كان له تأثير علي ...يعني من صغري وانا اقرا مجلة ماجد ... وانطر يوم الاربعا عشان اروح اشتريها ... وكانت شخصيتي المفضلة موزة الحبوبه :) وهالحجي تقريبا كان ليما وصلت المرحلة المتوسطه ... وذاك اليوم اقول حق بنت اخوي اللى برابعه ابتدائي واهي تتصفح مجلة اليقظة وتقرا اخبار هيفا ومريام فارس ...ليش ماتقرين مجلات حق سنج مثل سبيس تون او مجلة ماجد ترد علي تقول شنو انا ياهل!!! ياربي شنو هالجيل.... انا بعمرها كنت للحين قنقوصتين وشريطة..خلاصة القول...احنا بحاجة حق بناء جيل يقرأ لان حضارة الاوطان تقاس بالقراءة
مثقفة
Subscribe to:
Post Comments (Atom)
18 comments:
القراءة
ثم القراءة
ثم القراءة
وعفية عليج
والله انتي المفروض ينضرب فيج المثل
بالدوام وجدام الناس
!!!
وتقرين؟؟؟
ما اشاء الله
انا اشجع على القراءة
والمرأة لازم تقرأ
لان القراءة ثقافة
صح كلامهم
بغض النظر اذا الكلام كان المقصد منه جارح او غيرة
الاهم
ان انتي قاعدة تسوين الي فيه مصلحتج
ما اشاء الله عليج
الى الامام دائما
:)
موفقة
صح لسانج
في الدول الاوربيه يجبرون الطلبه على القراءه منذ الصغر
اي يغرسوا فيهم حب القراءه
باستخراج معلومه من كتاب
او استنباط فكره من كتاب اخر
موضوعك جميل جدا
مرحبا و سهلا
القراءة في حياتنا مهمشة مانقرا الا يوم ننجبر انه نقرا التقارير او البروجكت بس نقرا كتاب او غيره الصارحه ماتعودنا و احنا صغار
ربي يحفظج
واتمنى لج التوفيق
i love reading too.. :)
أؤيدك في أن القراءة مقياس تحضر و ثقافة و تقدم الأمة .. أدركت أهمية القراءة في وقت متأخر و الحمدلله بدأت أقرأ .. و أحسست بأنها متعة .. عسى الله يتمم علينا
قوووه
انا جذي حطيتلي كتاب يعني على بني بقرا بس وين الشغل ما اخلي قمت و حطيته تحت مخدتي على اساس قبل لا انام اقرا او و انا منسدحه الظهاري عمج اصمخ ماكو فايده قمت حتى المجلات ما اقراهم مع انه ريلي يقرا وايد و يستعمل الكتب الالكترونيه بس انا قمت ما اطيج القرايه
بس هذا انعكس علي قمت حتى كلمتين على بعض ما اعرف اصفهم و مضايجه من نفسي
عفيه شجعونيي
merci all :)
شجعتوني اني ازيد جرعة القراءة
أهني المشكلة أن الواحد يكون صح ويخاف !
الواحد صار يخاف يفرش سياته ويصلي جدام الناس لا يقولون عنه ديّن .. يخاف ياكل فلافل وبطاط عن خاطره عشان لا يقولون عنه هلاقة، يخاف يحلق عن الباكستاني اللي وره بيتهم، عشان لا يقولون عنه هيليقي.
الديرة صايرت تمشي على أمزاج الناس مو على الطريق الصواب
Blog 3amty
Q8 Chili سابقا
موضوعج حلو
ياريت يسوون حملة
نبيها قراءة :)))
ويخصصون ساعه فى المدارس للقراءة ,
وفى ايام العطلة الصيفيه للناس اللى ما يسافرون , المفروض القطاع الخاص بالتعاون مع المشروعات السياحية وادارة الانشطة فى وزارة التربيه يحطون خطة للاطفال والشباب يغرسون فيهم حب القراءة , ويبتعدون عن الانشطة السخيفه والبايخة اللى يسوونها فى فترة الصيف
بس المشكله
لا حياة لمن تنادى
وين القراءة الحيـــــــن
احس
اليهال
يشوفون اللي يقرا
يسوي شي غلط
من جذي لازم
حمله
:P
أول أمر نزل بالقرآن
إقرأ
والقراءة أنواع وليست فك الخط وحسب
لكن القراءة التمعن في كل شيء حولنا
وإن كان أولها قراءة الحروف
ودمتم بحب وود واستنارة
خسران من تخلى عن صديقه
كنت اكره القراءه لدرجه اني احس بدوخه لمن ابطله ...لكن تعلمت ان الحكمه و النزاهه و قدر الشخص بمقدار اخلاقه و ثقافته
بوست رائع...
والله .. كانج تتكلمين عن حال نفسي
انا نفسج احب القراءه واموت عليها
واخذ كتب معاي للدوام .. علشان اذا حصلت لي فرصه اقرا
حييييييل استانس بالقراءه
والحين صارت الكتب تنرص يم راسي ولا احركهااااا
وكلام الناس بالله مايخلص يالمثقفه .. ويالعالمه ..
ماعلي منهم
النت ماقصر مايعطينا فرصه نقرا اي شي من الكتب
بس عندي القراءه بالكتب احلى واااااايد
ياحلو مجله ماجد وباسم .. وميكي ماوس واقلد اصوات بعد ذكريات حلوه
شنو الكتاب؟
للاسف وايد ناس اهملوا القراءه مع انها حلوه
ولمن تمسكين كتاب وتقرينه تحسين بمتعه اكبر
القراءه مفيده مفيدع مفيده
thank you for that =D
your post made me wanna read again,
in fact i searched between the books i have and chose a book to read tonight =D
صاجه
و غالبية الناس تستنكر القراءه
ما جنها تزيد الحصيله الادبيه و الفكريه للفرد
و نسبة قراءة الكتب عندنا بالكويت متدنيه جداً
و الدليل ،،، معرض الكتاب و نوعية الكتب اللي تمشي فيه
اتصدقين هلكمله وايد تنسمع صار اللي يقرى جنه حيوان معرض للانقراض ( مع احترامي لجميع القراء وانا وحده منهم) بس ليش اصبحنا انتملل من القراءه؟ احسن وسيله عشان توصلك المعلومه اهيا الكتاب و اعتقد قريت دراسه قالوا فيها لو انتشرت التكنلوجيا للاسف الكتاب بيصير بالمتاحف هههه و احنا من الحين مقطوط
Post a Comment