الشرطه النسائيه

- Posted using BlogPress from my iPhone.

لما أشوف بناتنا الشرطيات بالمجمعات وايد استنانس ،صج احسهم قدها وقدود ويرفعون الراس ... بس المشكله بعض الناس اللي ماتشوف بهالشرطيات الا انهم " اناث" وبس!!

30's is Glory

مادري ليش احس اني وايد كبرت ....كل ما اقعد بيني وبين نفسي احس هالاحساس ....كذا شغله خلتني احس هالاحساس

• اغلب اللي كانوا يهال بعايلتنا وانا تقريبا شايلتهم وحاضره ولادتهم ونون مشيتهم كبروا وتزوجوا وبعضهم عيَلوا
• صرت افضل المشروبات الحاره علي البارده ..اذا قعدت بكافيه اطلب تركش كوفي ولا شاي اخضر مافكر اطلب عصير ولا برد
• وانا اسولف وايد اقول تذكرون لما كنا نسوي جذي , احنا ايامنا كان جذي ,يا حلاة ذيك الايام
• صايره احب انصح وايد جني عيوز ,,, انصح بنات اخوي انصح رفيجاتي ساعات
• احب الموضه والستايل بس ماني قادره اجاريها وايد , احاول كثر مااقدر بس مو كل هبَه صايره تدش مزاجي

اليوم بنت اخوي تسألني جم عمرج؟ قلت لها لا تسألين إمراه عن عمرها! جان تقولي لا صج جم؟ 20؟ :) اشوه ردت روحي شوي :)

123 Go

- Posted using BlogPress from my iPhone.

Testing From my iphone

HaPpY BirThDay My BaBies

مرت الايام بسرعه وكملوا بناتي الحلوين سنه ....ماني مصدقه جني امس يايبتهم ....كبروا الحلوين وصاروا حريم :) .....ماسويت لهم عيد ميلاد لان توهم صغار ما يدرون شسالفه ههههه ....بس ما قصرت عمتهم شرت لهم كيكه وسوت لهم عيد ميلاد مصغر وانا شريت لهم كيكه بيوم زوارتنا

كيكتي

كيكة عمتهم

كل عام وانتو بخير يا احلي البنات

وحوش بين رفوف الجمعيه

احب اذا رحت الجمعيه احوس صوب قسم الكريمات والشامبوات اشوف شنو اليديد والمعروض ...الحين طبعا صرت احوس اكثر صوب قسم الحفاظات ولوازم الاطفال....بس فيه شي بالجمعيه ينغص علي استمتاعي بهالمهمه....وحوش تتربص لي وحق غيري واقفين بين الرفوف اللهم ياكافي ...لابسين بوالطو بيض ومرتزين ....هالوحوش اهما مندوبين التسويق مادري صح اسمهم جذي ولالا .... عسى ما خطت ريلي صوبهم الا تيمعوا علي من كل صوب ....تفضلي يا مدام عندنا عرض ....يامدام الكريم ده بينعم البشره ويخليها جنان......ابتسم بكل نعومه واقول لا شكرا ...عبالكم يفجون لاااا...يظلون حنه وراي لين ازهق واروح مكان ثاني... ...وحده منهم مره قالت لي بكل صراحه كانت واقفه وراي وانا اشتري شغله حق بناتي ومو راضيه تفج قالت لي ..اصل السوبرفايزر بيبص علي وحيكلمني لو سبتك !!! شقولها هذي بالله ...قطيت اللى بيدي ومشيت ..ترى مو قاعده ابالغ بس اللى بجمعيتنا شي مو طبيعي ولله وما يوقفون الا عند الاقسام اللي احب اتمشى فيها مشوار الجمعيه صار بائس وتعيس صراحه

يـــــــــــــــارب تكتبها لي مره ثانيه

كل سنة مع اقتراب موسم الحج يكون السؤال اللى يتردد دايما ......منو بيروح الحج السنه؟ مع اى حملة بتروحون؟ ومع هالاجواء الحلوة يفر قلبي على الحج مره ثانيه...واتمنى اكون مع الحجاج واذوق حلاوة هالتجربه الروحانيه اللى مهما الانسان يوصفها ما يقدر يعبر عنها بالكلمات...وصدق الحديث الشريف :من حج لله فلم يرفث ولم يفسق رجع كيوم ولدته امه ... وفعلا الانسان لما يرجع من الحج يحس جنه توه مولود وانه نفسه صافيه ويزهد الدنيا وما فيها .... يارب تكتبلي حجه ثانيه قبل ما اموت وتكبتبها حق كل مسلم يارحمن ياكريم وكل عام وانتم بخير وعيدكم مبارك مقدما :)

TwinS

حياتي عقب التوأم ....مميه وبامبرز :P الامومه صج صج مسئوليه وتعب ومع التوينز كل شي دبل ....التعب والسهر والمعاناة ياربي متى تكبرون وتمشون وتصيرون اوادم :P