✯Ƥǫşţęd Ƒŗǫɱ Mƴ įƤђǫŋę✯.
عسى ما يهبون فيه بنات الكويت بس !
سوالف نص رمضان
- Posted using BlogPress from my iPhone.
مر رمضان بسرعه وتناصف. خلصنا من لوية القرقيعان والحين عاد لوية التجهيز حق العيد وتكملة باجي النواقص. طبعا عقب الفطور الطلعه ترفع الضغط وتييب الجلطه الشوارع مسكره جنه محد قاعد ببيتهم. علي قولتهم. " شدعوه عليكم " :]. فأنا قررت اخلي طلعاتي الظهر والعصر. صج انه الجو حر جهنم بس اهون من الوقفه بالشارع والزحمه. ،، ياحلاة رمضان. ولويته. من عقب الفطور نجابل القهوه والحلو وتالي ركضه ركضه عشان نلحق علي التراويح، اجواء روحانيه حلوة وتسابق علي الطاعه. بس السنه مسلسلات رمضان الكويتيه مو صج ، حياة الفهد ليش كل مسلسلاتج فيها اغتصاب؟ الداية والسنه ليلة عيد، مسلسل زوارة خميس لا تعليق صراحه. مشاهد وحوارات تفشل وايحاءات جنسية ولله عيب ماجنه مسلسل كويتي جنه فلم حق نادية الجندي ولا نبيلة عبيد. ، اللي صج يشوق مسلسل ساهرالليل واي ياحلاة لبسهم وكشختهم وحياتهم. ودي ادش بالتلفزيون اعيش وياهم هاهاهاي. {اخر الكلام. : عساكم من عواده}...شرايكم بقرقيعاني :)
الشرطه النسائيه
- Posted using BlogPress from my iPhone.
لما أشوف بناتنا الشرطيات بالمجمعات وايد استنانس ،صج احسهم قدها وقدود ويرفعون الراس ... بس المشكله بعض الناس اللي ماتشوف بهالشرطيات الا انهم " اناث" وبس!!
30's is Glory
مادري ليش احس اني وايد كبرت ....كل ما اقعد بيني وبين نفسي احس هالاحساس ....كذا شغله خلتني احس هالاحساس
- اغلب اللي كانوا يهال بعايلتنا وانا تقريبا شايلتهم وحاضره ولادتهم ونون مشيتهم كبروا وتزوجوا وبعضهم عيَلوا
- صرت افضل المشروبات الحاره علي البارده ..اذا قعدت بكافيه اطلب تركش كوفي ولا شاي اخضر مافكر اطلب عصير ولا برد
- وانا اسولف وايد اقول تذكرون لما كنا نسوي جذي , احنا ايامنا كان جذي ,يا حلاة ذيك الايام
- صايره احب انصح وايد جني عيوز ,,, انصح بنات اخوي انصح رفيجاتي ساعات
- احب الموضه والستايل بس ماني قادره اجاريها وايد , احاول كثر مااقدر بس مو كل هبَه صايره تدش مزاجي
HaPpY BirThDay My BaBies
مرت الايام بسرعه وكملوا بناتي الحلوين سنه ....ماني مصدقه جني امس يايبتهم ....كبروا الحلوين وصاروا حريم :) .....ماسويت لهم عيد ميلاد لان توهم صغار ما يدرون شسالفه ههههه ....بس ما قصرت عمتهم شرت لهم كيكه وسوت لهم عيد ميلاد مصغر وانا شريت لهم كيكه بيوم زوارتنا
كيكتي
كيكة عمتهم
كل عام وانتو بخير يا احلي البنات
وحوش بين رفوف الجمعيه
احب اذا رحت الجمعيه احوس صوب قسم الكريمات والشامبوات اشوف شنو اليديد والمعروض ...الحين طبعا صرت احوس اكثر صوب قسم الحفاظات ولوازم الاطفال....بس فيه شي بالجمعيه ينغص علي استمتاعي بهالمهمه....وحوش تتربص لي وحق غيري واقفين بين الرفوف اللهم ياكافي ...لابسين بوالطو بيض ومرتزين ....هالوحوش اهما مندوبين التسويق مادري صح اسمهم جذي ولالا .... عسى ما خطت ريلي صوبهم الا تيمعوا علي من كل صوب ....تفضلي يا مدام عندنا عرض ....يامدام الكريم ده بينعم البشره ويخليها جنان......ابتسم بكل نعومه واقول لا شكرا ...عبالكم يفجون لاااا...يظلون حنه وراي لين ازهق واروح مكان ثاني... ...وحده منهم مره قالت لي بكل صراحه كانت واقفه وراي وانا اشتري شغله حق بناتي ومو راضيه تفج قالت لي ..اصل السوبرفايزر بيبص علي وحيكلمني لو سبتك !!! شقولها هذي بالله ...قطيت اللى بيدي ومشيت ..ترى مو قاعده ابالغ بس اللى بجمعيتنا شي مو طبيعي ولله وما يوقفون الا عند الاقسام اللي احب اتمشى فيها
مشوار الجمعيه صار بائس وتعيس صراحه
Subscribe to:
Posts (Atom)
