السفر متعه ووناسه مالها حدود وكل انسان وده يسافر كل سنه يغير جو ويجدد نشاطه ويتعرف على ثقافات وعادات المجتمعات الثانيه.. لكن اذا ماحصلت للواحد فرصه انه يسافر بالصيف لظرف من الظروف هل اهوه بهالحاله ينعد من فئة الفقاره والحفاي والهيلق.. او انه ينحط بمستوى اقل من باجي الناس اللى تسافر؟..وحدة من زميلات الدوام فاتحه موضوع السفر من شهر 3 اللى طاف وكل يوم والثاني تسألنا " ها ماراح تسافرون هالسنه " واذا وحده منا ردت انها السنه ماراح تسافر ترد علينا بكلماتها الفذه " انا اذبح نفسي واتسلف بس اسافر.. ماقدر تمر علي سنه بدون سفر " مع العلم ان عليها اقساط وقروض ومتسلفه من ناس بس المهم انها تسافر.. معقوله في ناس تفكيرها جذي؟!.. اضغط على عمري طول السنه واهلق بروحي عشان استانس شهر او اقل وتالي ارد حق الديون والغثا!؟.. انا للاسف ماقدر اسوي وماقدر ابخل على نفسي بشي .. حصلت لي سفره اهلا وسهلا.. ماحصلت اقعد هني واستانس كثر ماقدر بدون ديون وعماة عين
خلاصة الحجي : على أد لحافك مد رجليك :))
4 comments:
والله عندى سافرت ما عندى انثبرت وقعدت وانطميت تحت التكييف
بس المشكلة هالسنة احتمال ماكو كهرباء:(
يعنى دقرة هالكبر
فالله يرزقنا ونسافر:)
اولا الحمدلله على العقل
في ناس مادري اشلون صايره...
اناسمعت ان في ناس ياخذون قروض عشان استقبال الولاده...
@@
ترى كلنا عيال قريه وكل من يعرف خويه
انعرف اللي عنده واللي ماعنده
فليييييش نذبح روووحنا؟؟
قال صلى الله عليه وسلم:
من بات أمناً في سربه معافىً في بدنه عنده قوت يومه فكأنما حيزت له الدنيا
القناعه نعمه والرضى كنز
الله لايفتنا
يا هلا بالصيف .. بس شعارنا بدون سفرات ..
آخر مرة سافرت رحت أستراليا و ماليزيا صيف 2005
و للحين ما خذيت إجازة من ذاك اليوم !!
و مو شرط الواحد يسافر ..
و حتى لو إلا أسافر ..
عندي الإمارت و لا الخبر و لا البحرين .. إلا أوربا أو أمريكا و لا ما يصير !!
الله عطانا عقل نفكر فيه
الحمد لله على العقل ..
عني ما سافرت إذا ماعندي فلوس ..
بعد هذي حالة أحط على نفسي ديون على شان أسافر !!
عجبني رد الأخت سالفة قلب..
وعلى ايش وجع القلب.. عشان انبسط
كم يوم و ارجع مديون..
اذا توافرت المادة يقدر الواحد وقتها
يسافر واذا ماعنده يجلس مستور في بيته
وليش الديون و السلفيات؟؟
Post a Comment